بقلم: الكاتب الكبير اكرم السعدني في سلسلته الشهيرة " سعدنيات " كواليس اللقاء التاريخي بين السعدني وصدام حسين وسر "الـ 5 آلاف دولار"!

_{.  بقلم: الكاتب اكرم السعدني} 

. _ موسوعة السعدني _ من حكايات الكاتب الكبير اكرم السعدني في سلسلته الشهيرة " سعدنيات "

كواليس اللقاء التاريخي بين السعدني وصدام حسين وسر "الـ 5 آلاف دولار"! 

لما عمنا محمود السعدني كان بيكتب في الصحافة العراقية، كتابته خطفت عين الرئيس صدام حسين؛ لأنها كانت بعيدة تماماً عن "الكلام المجعلص" والأسلوب اللي "يديك بونية في وشك" المنتشر وقتها. صدام ارتاح للسعدني، ومن هنا بدأت قصة كواليسها تجمع بين السياسة، والجدعنة، والمفارقات الكوميدية!

الشكوى لـ "صدام".. والأجهزة اللي مِلتها واحدة! 

في كواليس الشغل في العراق، السعدني اتعرض لمضايقات وعذاب كبير من مسؤولين كبار زي "طه ياسين رمضان"، لدرجة إنهم خنقوا مجلته "23 يوليو" في التوزيع لمجرد العناد! السعدني لما لقى الموضوع زاد عن حده، قعد مع صدام حسين واشتكى له من تضييق الأجهزة التنفيذية عليه.

صدام حسين بصله وقال له بالحرف:

"أخ محمود.. أنت تدري أنا إيش حصل معايا في مصر زمان؟"

وحكى لـ السعدني إنه لما كان طالب في كلية الحقوق في مصر في الخمسينات وساكن في الدقي، رجع بيته فجأة لقى اتنين من أجهزة الأمن المصرية بيفتشوا في حاجته، ودارت بينهم خناقة وضرب "موت"! (والغريب إن واحد من الاتنين دول بقي وزير حكم محلي في مصر بعد كده!).

صدام كمل وقال للسعدني: "يا محمود.. الأمة العربية همّها واحد، وأجهزتها بتعمل نفس الشيء مع الجميع.. أنت ليه تريد العراق أفضل من مصر؟ المسؤول اللي عندك في مصر أنا ما أقدرش أغيره، ونفس المشاكل والعيون هنا وهناك! بس أنت هنا فوق دماغ العراقيين كلهم، وأوعدك لو حد زعلك تاني.. نازلة مع صوري، لن يجرؤ أحد يمس شعرة منك!".

حكاية "جروبي" والراجل النوبي الجدع! 

المفارقة الأجمل، إن صدام حسين والسعدني كان بيجمعهم رابط قديم في مصر وهما ميعرفوش.. كافيه "جروبي" الشهير!

صدام وهو طالب، كان بيروح يقعد هناك، وفي مرة فلوسه خلصت ومعرفش يحاسب، فكان فيه "مشرف نوبي" جدع جداً شغال في المكان، ربنا مدي له فراسة؛ لمح إن صدام محرج، فجاء وبلّغه بكل ذوق إن "الحساب واصل" وفضل يعمل معاه كده طول ما فلوسه متأخرة.

نفس الموقف حصل مع السعدني! دخل "جروبي" لابس بدلة جاكتها طويل عليه، وقعد وسط مثقفين ومعهوش مليم يحاسب، والناس مستنية لحظة إحراجه.. فجأة الراجل النوبي الجدع ده دخل وسلم على السعدني بحفاوة وعمل نفسه بيجيب فلوس من جيب السعدني وبيقول له: "حسابك واصل يا أستاذ"، فأنقذه من الإحراج قدام الكل!

الأمانة مع أحمد بهاء الدين.. والـ 5 آلاف دولار! 

لما الكاتب الكبير أحمد بهاء الدين زار العراق (وكان السعدني بيحترمه جداً ويقول له "يا عم بهاء" لثقافته)، صدام حسين كان مبهور بتأثير مصر وثقافتها اللي فتحت الأبواب لكل العرب أيام عبد الناصر.

في نهاية اللقاء، وبسبب بروتوكولات معينة، صدام مكنش عايز يبعت حد من طرفه عشان ميتأذيش، فدخل عسكري بصينية فضة عليها أمانة، وطلب صدام من "عم بهاء" يوصلها بنفسه للراجل النوبي الجدع بتاع "جروبي" في مصر!

ولما "عم بهاء" رجع مصر، وراح لـ "جروبي" وسلم الراجل الأمانة.. الراجل فتحها لقى فيها 5 آلاف دولار! الراجل اذهل وقاله: "إيه ده كله؟ ومين صدام ده؟".. ومكنش يستوعب إن الطالب العراقي البسيط اللي كان بيمر بأزمة فلوس زمان، بقى رئيس جمهورية العراق ولسه فاكر جميله بعد كل السنين دي

للمزيد اضغط هنا...